மதவாதம் - ஏசுவின் உயிர்த்தெழுதல் ???

ஏசுவின் உயிர்தெழுதல் ???

                  ஏசுவின் உயிர்த்தெழுதல் ???

 

 

 

அன்பையும், கருணையையும், சமாதானத்தையும் போதிக்கும் எங்கள் மதம் என்று பறை சாற்றிக் கொள்ளும் மதவாதிகள், தங்கள் மதத்தை கேள்வி கேட்கும் ஒருவனை எவ்வளவு கொடூரமாக கொல்கிறார்கள் என்பதற்கு இன்னுமொரு உதாரணம் இந்த படத்தில் காணப்படும் Giulio Cesare Vanini.

கிபி 1619 ஆம் ஆண்டு, தனது 34 வது வயதில் பிரான்சு நாட்டின் துளூஸ் நகரில் பொது மக்களின் முன்னிலையில்  நாக்கு பிடுங்கப்பட்டு, கழுத்து நெரிக்கப்பட்டு குற்றுயிரும் குலையுருமாய் நெருப்பில் தூக்கி வீசப்பட்டார்.

இவர் செய்த மாபெரும் தவறு, இயேசு கிறிஸ்துவின் உயிர்தெழுதலை கேள்வி கேட்டார் . அது எப்படி சாத்தியம் என்று பிரச்சாரம் செய்தார்.

பொறுப்பார்களா மதத்தை காக்க வந்த மாமணிகள்.

அவருக்கு தரும் தண்டனையைப் பார்த்து இனி வேறொருவன் இதே போல சிந்திக்கவே பயப்பட வேண்டும்,

மத குருமார்கள் சொல்வதை  கேள்வி கேட்காமல் அப்படியே  அனைவரும் அடி பணிந்து ஏற்றுக்கொள்ள வைக்க கடுமையான தண்டனை தர தீர்மானித்ததின் விளைவே இந்த காட்டுமிராண்டித்தனமான தண்டனை.

 

கடவுள் தான் மனிதனைப் படைத்தான், காக்கிறான். அவனன்றி ஓர் அணுவும் அசையாது என்பவர்கள், தங்கள் கடவுளை, புனித புத்தகத்தை, நம்பிக்கையை பற்றி ஒருவன் கேள்வி எழுப்பினால், இவர்கள் தான் கடவுளை காக்க கிளம்பி விடுகின்றனர்.

 

ஆக மத வெறியாளர்கள், இப்பொழுது மட்டுமல்ல, எப்பொழுதும் எங்கும் எல்லா மதத்திலேயும் நிறைந்தே இருந்திருக்கிறார்கள் ,இருக்கிறார்கள், இருப்பார்கள்.  

 

ஆனால் ஒரே ஆறுதல்.

 ஆறாம்அறிவைப் பயன்படுத்தி, சிந்தித்து கேள்வி எழுப்புவர்களும் எப்பொழுதும் எங்கும் எல்லா மதத்திலேயும் இருந்திருக்கிறார்கள் ,இருக்கிறார்கள், இருப்பார்கள்.  

பெரியார் சிந்தனை மரபின் மூத்த அறிவாளி திருவாரூர் தங்கராசு அய்யா அவர்களுக்கு அஞ்சலி

திருவாளர் திருவாரூர் தங்கராசு அய்யாவின் பெயரைக் கேட்டாலே எனக்கு இரத்தக்கண்ணீர் காவியம் தான் நினைவில் வரும். அதில் வரும் ஒவ்வொரு வசனமும் சிரிக்க மட்டுமன்றி சிந்தனையை தூண்டவும் செய்யும்.

பெரியாரின் மரணத்திற்கு பின் அவருக்கும் தி. க. தலைவர் திரு கி. வீரமணிக்கும் கருத்தொற்றுமை இல்லாததால், அவர் திராவிடர் கழகத்தை விட்டு பிரிந்து விட்டதாக கேள்விப் பட்டிருக்கிறேன்.

மேலும், எம்.ஜி.ஆர் அவர்கள் தமிழக முதல்வராக இருந்த பொழுது பெரியாரின் தமிழ் எழுத்து சீர் திருத்தத்தை சட்ட வடிவம் ஆக்கியதில் திருவாளர் தங்கராசு அய்யாவின் பணி அளப்பரியது.

அவர் தன் புகழ் நினைத்து இறுமாப்பு கொள்ளாமல் இறுதி வரை எளிமையாகவே வாழ்ந்தவர் என்றும் தனக்கு கிடைக்கும் நன் கொடைகளை கூட திராவிட இயக்கங்களுக்கே அர்ப்பணித்தார் என்றும் சொல்லப் படுகிறது.

அவரின் மரணச்செய்தி ஏனோ மனதை பாதிக்க தான் செய்தது.

அவரின் பூதவுடல் மறைந்தாலும் புகழுடல் என்றும் நம்மோடு  நிலைத்து இருக்கட்டும்.

 

இனி திருவாளர் தங்கராசுவை நன்கு அறிந்த தோழர் மதிமாறனின் எழுத்திலிருந்து :

தமிழகத்தில் நவீன சிந்தனையை பெரியாரே துவக்கி வைக்கிறார்.

2000 ஆண்டுகளாக நம்பிக்கொண்டிந்த புனிதங்களை இந்து மதத்தை பார்ப்பனியத்தை கடவுளை தலைகீழாக்கி நொறுக்கியவர் பெரியாரே. 1925 க்குப் பிறகு தமிழகத்தில் புதிய எதிர் சிந்தனை மரபை அவரே உருவாக்கினார். அதையே தொடந்து மக்களிடம் கல்லடியும், செருப்பு வீச்சையும் எதிர்கொண்டு அஞ்சாமல் தொடர்ந்து பிரச்சாரமும் செய்தார்.

ராமாயணம், மகாபாரதம், பெரிய புராணம் இதன் பெருமைகளும் அதனூடக பார்ப்பன மற்றும் பார்ப்பனரல்லாத ஆதிக்க ஜாதிக்கர்களின் ஜாதித் திமிருமே, தமிழகத்தின் கலை வடிவங்களாக இருந்தன.

திரும்பும் திசையெங்கும் தெருக்கூத்து, நாடகம், தமிழ் இசை, கர்நாடக சங்கீதம், கதாகாலட்சேபம் என்று எளிய மக்களின் கலைவடிவங்கள் முதல் ஆதிக்ககாரர்களின் கலை வடிவம் வரை இதே கதைதான்.

தமிழகம் பல நூற்றாண்டுகளாக ஆதிக்க ஜாதி இந்துப் புராணக்குப்பைகளால் சக்கர வியூகம், பத்ம வியூகம் போன்று சுற்றி வளைக்கப்பட்டிருந்தது. அந்த வியூகங்களை உடைத்து உள் நுழைந்தவர் பெரியார் ஒருவரே.

பெரியார் சிந்தனை மரபில் பல மேதைகள் உருவாகினர். அதில் மிக முக்கியமானவர் திருவாரூர் தங்கராசு அய்யா. (தந்தைப் பெரியார் திராவிடர் கழகத்தின் மூத்த தலைவர்)

இந்துப் புராணங்களும் ராமனும் ராமாயணமும் அவரிடம் பட்ட பாடு சொல்லி மாளாது. நடிகவேள் எம்.ஆர். ராதாவுடன் இணைந்து அவர் நடத்திய ராமாயணம் நாடகம் அன்றைய காங்கிரஸ் அரசால் தடை செய்யப்பட்டது. ரத்தக்கண்ணீரில் அவருடைய பகுத்தறிவு வசனங்கள் இன்றும் என்றும் அது ஒரு பாடம்.

பள்ளிப் படிப்பை ஆரம்ப நிலையில் மட்டுமே படித்த திருவாரூர் தங்கராசு அவர்கள் தமிழ் புராணக்குப்பைகள் மேல் நடத்திய தாக்குதலை தடுக்க, எந்த பெரிய இந்துக் கண்ணோட்டம் கொண்ட மெத்தப் படித்த தமிழ் அறிஞர்களாலும் முடியவில்லை.

அவர் எழுதிய சிவனடியார் வரலாறு, சிவா விஷ்ணு லீலைகள் சேக்கிழரையும் பெரியபுராணத்தையும் சைவ சமயத்தையும் சந்தி சிரிக்க வைத்தவை.

நடிகர் ரஜினிகாந்த் சில வருடங்களுக்கு முன் ‘உன் முதுகையே உன் கண்களால் பார்க்க முடியாது. அதற்காக முதுகே இல்லை என்று ஆகிவிடுமா? அதுபோல்தான், கடவுளை பார்க்க முடியவில்லை என்பதால் கடவுள் இல்லை என்று ஆகிவிடுமா?’ என்று கேட்டார்.

அதற்கு அய்யா தங்கராசு சென்னை எண்ணூரில் பெரியார் திராவிடர் கழகம் நடத்திய தெருமுனைக் கூட்டத்தில், இப்படி பதிலளித்தார்:

“முதுகை மட்டுமல்ல, ஒருவன் அவனுடைய ஆசனவாயைக் கூட அவன் கண்களால் நேரடியாக பார்க்க முடியாது. அதுக்காக அதான் கடவுள் என்று சொல்ல முடியுமா? கண்ணாடி உதவியிருந்தால் அவனவன் முதுகையும் ஆசன வாயையும் கூட அவன் கண்களால் பார்க்க முடியும். எத வைச்சி பாரத்தால் உன் கடவுள் தெரிவான்.” என்றார்.

எழுத்து, பேச்சு என்று மட்டமல்லாமல், அந்தக் காலத்தில் பெரியாருக்கு எதிராக பேசியவர்கள் கூட்டத்தில் புகுந்து, கலகம் செய்ததிலும் அய்யா தங்கராசுவின் செயல் போற்றுதலுக்குரியது.

பெரியாரின் தீவீரத் தொண்டரும், திருவாரூர் தங்கராசின் சிஷ்யருமான திருச்சி வீ.அ. பழனியுடன் சேர்ந்து கொண்டு எதிரிகளோடு அவர் நேரடியாக மோதிய சம்பவங்களும் உண்டு.

இந்து மகா சபை தலைவர் மதுரை சிவனாண்டித் தேவர் என்பவர், பெரியாரை திட்டி ‘கருப்புச் சட்டைக்காரனுக்கு என்ன தெரியும்? அரிச்சுவடி பாடத்தை நாங்கள் சொல்லித் தருகிறோம். வரச் சொல்..’ என்று சவால் விட்டு பேசிக் கொண்டிருந்தபோது, பழனியுடன் மேடையருகே சென்று, பழனி மேடையில் ஏறி சிவனாண்டித் தேவர் பேசிக் கொண்டிருந்த மைக்கை பிடிங்கி கேள்வி கேட்டவுன், கொத்தளித்தது அங்கிருந்த கூட்டம்.

“நீ தானே அரிச்சுவடி சொல்லிக்கொடுக்கிறேன்னு சொன்ன.. சொல்றா.. இல்ல நான் உனக்கு சொல்லிக் கொடுக்கட்டுமா?” என்றதும்.. அதுபோலவே பெரியாரை இழிவாக பேசிய விபூதி வீரமுத்துவை அய்யா பழனியும் மற்றத் தோழர்களும், மேடைஏறி வீரமுத்துவிற்கு எருக்கம் பூ மாலை போட்டதும்… பிறகு அவனை ‘சிறப்பாக’ கவினத்ததிலும்… அய்யா திருவாரூர் தங்கராசுவின் பின்னணி முக்கியமானது.

**

பெரியார் சிந்தனையின் சிறப்பே தர்க்கம் (Logic). எவ்வளவு பெரிய விசயத்தையும் ஒரே ஒரு கேள்வியில் கந்தலாக்குவது.

பெரியாரின் அந்த மரபு திருவாரூர் தங்கராசு அய்யாவிடம் நிரம்பி இருந்தது.

சாதாரண பொதுக்கூட்டத்தில், இப்படி ஒரு கேள்வி கேட்டார் அய்யா தங்கராசு:
“ராமன் காட்டுக்குப் போறேன்னுதானே கிளம்பினான். அயோத்திக்கு எந்தப் பக்கம் காடு இருக்கு? வடக்கு பக்கம்தானே.. இமய மலையே அயோத்திக்கு வடக்குல தானே இருக்கு. அப்புறம் எதுக்குடா ராமன் காட்டுக் போறேன்னு தெற்கு பக்கம் வந்தான்? திருட்டுப் பய.. அதுலதான் நமக்கு எதிரான அரசியல் இருக்கு”

திருவாரூர் தங்கராசு அவர்கள் கேட்ட இந்தக் கேள்விக்கு இன்று வரை பதில் இல்லை.
நவீன சிந்தைனை மரபின் மூத்த அறிவாளியின் மரணம், மாற்று சிந்தனையாளர்களுக்கு பேர் இழப்பு.

http://mathimaran.wordpress.com/2014/01/05/modern-ideological-732/

 

காரைக்கால் ஏன் டெல்லியாகவில்லை ? - அ.வெண்ணிலா கேட்கிறார். பதில் தெரிந்தவர் சொல்லுங்களேன்

காரைக்காலில் 15 பேர் சேர்ந்து ஒரு பெண்ணை வன்புணர்ந்து ஒரு வாரமாகியும், இதை கண்டிக்கும் எதிர்ப்பு குரல்கள் ஏதோ அங்கொன்றும் இங்கொன்றுமாகவே ஒலிக்கிறது.

தலை நகர் தில்லியில் இதே போல் அய்ந்து நபர்களால் ஒரு பெண் சீரழிக்கப் பட்டபோது நாடே குலுங்கியது. ஆனால் இந்த நிகழ்வில் மீடியா, பதிவுலகம், பொது சனம் என்று அனைவரிடமும் கனத்த மவுனம் மட்டுமே நிலவுகிறது.

 

குற்றவாளிகள் சாதியினாலும் மதத்தினாலும் சிறுபான்மையினராக இருக்கின்ற காரணத்தினாலேயே அனைவரும் கள்ள மவுனம் சாதிக்கின்றனர் என்று எழுதும் பதிவர் அருள் பொன்றவர்கள் சொல்வது உண்மைதானா.

 

அப்படி சாதிக்கொரு நீதி பார்ப்பது உண்மை என்றால் சங்கரராமன் கொலை வழக்கில் சங்கராச்சாரியர்கள் குற்றம் சாட்டப் பட்டிருந்த போது (இப்பொழுது விடுதலை பெற்று விட்டனர்) சங்கராச்சாரியர்களை  எதிர்த்து சோவும் குருமூர்த்தியும் இன்ன பிற பார்ப்பன பத்திரிக்கையாளர்களும் எழுதவில்லை என இவர்கள் அவர்களை கண்டித்தது எந்த விதத்தில் நியாயம் ?

 

குற்றம் யார் செய்தாலும் குற்றமே ! குற்றத்தின் தன்மையை மட்டுமே நோக்க வேண்டும் மாறாக குற்றவாளியின் மதம், சாதி போன்ற எதையும் பார்க்க வேண்டிய அவசியமில்லை.

 

இதோ அத்தி பூத்தாற்போன்று இதைப்பற்றி ஒரு கட்டுரை, திரு வெண்ணிலா அவர்கள் எழுதியது  இன்று வெளியாகி உள்ளது. அதை கீழே காண்க :

 

 

காரைக்கால் ஏன் டெல்லியாகவில்லை?

அ.வெண்ணிலா

 

ஓராண்டுக்கு முன் என்னுடைய நண்பர் ஒருவர் டெல்லி சென்றிருந்தார். காலை ஒன்பது மணியளவில் அவர் கைபேசியில் அழைத்து, உணர்ச்சிவசப்பட்டுப் பகிர்ந்துகொண்ட செய்தி இன்னமும் எனக்கு அதே உணர்வெழுச்சியுடன் மனதில் இருக்கிறது.

ஒவ்வொரு சனிக்கிழமையும் குடியரசு மாளிகையின் பாதுகாப்பு வீரர்கள் பணி மாற்றிக்கொள்ளும் சடங்கு வெகு விமர்சையாக நடைபெறும். அன்று சனிக்கிழமை. அதை வேடிக்கை பார்க்க நண்பர் நின்றுகொண்டிருந்திருக்கிறார். அப்போது, பத்துப் பதினைந்து பெண்கள் அங்கு கூடி, நாட்டையே உலுக்கிய நிர்பயாவின் வழக்கில் நீதி வழங்கக் கோரி முழக்கமிடத் துவங்கியிருக்கிறார்கள். முதலில் யார் காதிலும் விழாத அளவுக்கு அந்தப் பெண்களின் முழக்கம் இருந்திருக்கிறது. விநாடிகள் கடக்கக் கடக்க… பத்து நூறாகவும் நூறு ஆயிரமாகவும் ஆயிரம் பல ஆயிரங்களாகவும் மாறி, இருபதாயிரத்துக்கும் மேற்பட்ட இளம் பெண்கள் அங்கு கூடிவிட்டார்கள். எப்படி வந்து சேர்ந்தார்கள் என்று யூகிக்கவே முடியாமல் சில நிமிடங்களுக்குள் அந்தப் பெண்கள் கூட்டம் கூடியிருந்தது.

எந்த அரசியல் தலைவராலும், அமைப்பாலும், அரசாலும் திரட்டப்படாமல், பாதிக்கப்பட்ட பெண்ணின் கண்ணீரைத் துடைப்பதற்காகத் தன்னெழுச்சியுடன் ஒன்றுதிரண்ட இளம் பெண்களின் கூட்டம் அது. அவர்கள் இந்திய நாடாளுமன்றக் கட்டிடத்தை முற்றுகையிட்டார்கள். பீய்ச்சியடிக்கப்பட்ட தண்ணீரும் வீசப்பட்ட கண்ணீர் குண்டுகளும் அவர்கள் முன் செயலிழந்து நின்றன. பெண் உடல் மீது நிகழ்த்தப்படும் பாலியல் வன்முறைகளுக்கு எதிரான கடுமையான வாசகங்கள்கொண்ட அவர்களின் ஆடைகள், ஊடகக்காரர்களையே மிரட்டின. நீதி கேட்டு ஒன்றுதிரண்ட பெண்களின் பேரெழுச்சியைக் கண்டு அரசு அதிர்ந்தது. வெற்றுக் கூச்சல்களுக்காக வழக்கமாக உள்ளே முடங்கிப்போகும் நாடாளுமன்றம், அன்று ஒரு நியாயமான எழுச்சிக்காக வெளியே முடங்கியது.

நாட்டின் தலைநகரத்தில், போதிய பாதுகாப்பில்லாததால் ஒரு மருத்துவ மாணவி, அவளுடைய நண்பருடன் இருக்கும்போதே வல்லுறவுக்கு உள்ளாக்கப்பட்டுக் கொல்லப்பட்டாள் என்பது சர்வதேச அளவில் இந்தியாவுக்குத் தலைக்குனிவை உண்டாக்கிய சம்பவம். இச்சம்பவம் தொடர்பாக சரியான முன்னெடுப்புகளைச் செய்த ஊடகங்களும், அப்படியான ஒரு நிர்ப்பந்தத்தை உருவாக்கிய பெண்களின் போராட்டங்களும் இந்த வழக்கை விரைந்து முடிக்க உதவின.

சரியான நீதி என்பது, பாதிக்கப்பட்டவர்களுக்கான நியாயம் கிடையாது. அதுவும் இழப்பு உயிராக இருக்கும்பட்சத்தில்.

டெல்லி காயமே இன்னும் ஆறவில்லை. அதற்குள் காரைக்காலில் 15 பேர் கொண்ட கும்பல் ஒரு பெண்ணைப் பாலியல் பலாத்காரம் செய்துள்ளது. உணவுக்காக வேட்டையாடும் மிருகங்கள்கூட இப்படிப் பாலியல் வன்முறையில் ஈடுபடுவதில்லை. மனிதர்கள் என்ற போர்வையில் பெண்ணை வேட்டையாடும் மிருகங்களை என்ன செய்வது?

குலைநடுங்கச் செய்யும் இதுபோன்ற சம்பவங்கள் நடக்கும்போதெல்லாம், ‘கருத்து கந்தசாமிகள்’ தங்கள் திருவாய் களைத் திறந்து உளறும் வார்த்தைகள் இன்னும் நாற்றமெடுத்தவை. “நிர்பயா, நள்ளிரவில் அரைகுறை ஆடையுடன் தன் ஆண் நண்பரோடு ஆபாசமாக இருந்ததே அவள் பாலியல் வன்முறைக்கு உள்ளாக்கப்பட்டதற்கான காரணம்” என்று ஓர் அறிஞர் தன் தீவிரக் கண்டுபிடிப்பைச் சொல்லியிருந்தார். இப்போது, “காரைக்காலில் பாதிக்கப்பட்ட பெண் ஒரு விலை மாது” என்று தன் ஆராய்ச்சிக்கு நடுவே கருத்துத் தெரிவித்த ஒருவர், வந்த எதிர்ப்புகளைப் பார்த்து, அது தன் கருத்தல்ல என திரும்பப் பெற்றுக்கொண்டிருக்கிறார்.

பெண்கள் பாலியல் வன்முறைக்கு உள்ளாக்கப்படும்போதெல்லாம் அவற்றுக் கான காரணங்களைப் பெண்கள் மேலேயே திருப்புவதற்கு எல்லோரும் தயாராக இருக்கிறார்கள். பாதிப்புக்கு உள்ளாக்கப்பட்ட பெண் அரைகுறை ஆடையோடு இருந்தாள். ஆண் நண்பரோடு ஆபாசமாக இருந்தாள். தனியாக இருந்தாள். அழகாக இருந்தாள். நிறைய ஆண்களோடு தொடர்புடன் இருந்தாள். பாலியல் தொழிலாளி. அவள் தோற்றமே தவறு செய்யத் தூண்டியது… இவையெல்லாம் காரணங்களாகக் கற்பிக்கப்படுபவையே. உண்மையில், அவள் பெண்ணாக இருப்பதே காரணம்.

பாலியல் வன்முறைக்கு ஒரு பெண் உள்ளாக்கப்பட்ட பிறகு, அதன் மீதான சட்ட நடவடிக்கைகளில் எவ்வளவு அரசியல்? பாதிக்கப்பட்ட பெண்ணின் இனம், சாதி; குற்றவாளியின் இனம், சாதி, அரசியல் பின்னணி, காவல் துறை, அதிகாரிகள், குற்றம் நடந்த இடம் இவையெல்லாம்கூடப் பாதிக்கப்பட்ட பெண்ணுக்கு நீதி கிடைப்பதன் பின்னணியாகச் செயல்படுகின்றன. நிர்பயாவுக்கு கொடுமை நடந்த இடம் தலைநகரம். உலக நாடுகளின் கேமரா லென்ஸ்கள் ஒளிரும் இடம், ஊடகங்கள் உருவாக்கிய உணர்வெழுச்சி, மாண வர்கள் ஒன்றுதிரண்டது… எல்லாம் வழக்கை ஓராண்டுக்குள் முடிவுக்குக் கொண்டுவர உதவின. அதே காலகட்டத்தில், தூத்துக் குடியிலும் ஒரு பள்ளி மாணவி பாலியல் வன்முறைக்கு உள்ளாக்கப்பட்ட கொடுமை நடந்தது. அந்த வழக்கின் விசாரணையே இன்னும் தொடங்கப்படவில்லை. சட்டம் எல்லோருக்கும் ஒன்றுதான். ஆனால், அது எல்லோருக்கும் ஒரே வேகத்தில் இல்லை.

15 பேர் சேர்ந்து ஒரு பெண்ணைப் பாலியல் வன்முறைக்கு உள்ளாக்குவது என்ற கொடுமையைக் கண்ணை மூடிக்கொண்டு ஒரு நிமிடம் யோசித்துப் பாருங்கள். இந்த சமூகத்தின் மீது காறி உமிழத் தோன்றவில்லையா? அந்தப் பெண் என்ன தவறு செய்தாள்? அவளின் தோற்றமும் நடவடிக்கையும் ஒழுக்கமும் அவள் சுதந்திரம் சம்பந்தப்பட்டது இல்லையா? ஒரு பெண்ணின் தோற்றமும் ஆடையும் அவள் தனிமையும் ஓர் ஆணை வக்கிரத்தை நோக்கித் தள்ளும் என்றால், அவன் மனிதன்தானா?

ஒரு பெண்ணின் உடலை வன்முறைக்கு உள்ளாக்குவது என்பது, அவள் உடல் மீதான அத்துமீறல். அந்த வன்முறையச் செய்ய - கணவன் உள்பட - எந்த ஓர் ஆணுக்கும் உரிமை இல்லை, அதிகாரம் இல்லை என்று சட்டங்கள் சொல்கின்றன. ஆனால், சட்டத்தை நடைமுறைப்படுத்துபவர்களே பல நேரங்களில் இந்த வன்முறைகளைப் பெண்ணின் தனிப்பட்ட ஒழுக்க விதிகளோடு பொறுத்திப் பார்த்து, பாதிக்கப்பட்ட பெண் தாக்கப்பட்டது நியாயமே என்று வாதிடுவது இன்னும் 1,000 வருடங்களுக்கு இந்தச் சமூகம் திருந்தவே திருந்தாதா என்று அயர்ச்சியைத் தருகிறது. ஒரு பெண் பொதுவெளியில் பாலியல் துன்புறுத்தலுக்கு உள்ளாக்கப்படும்போது, பல நூறு பெண்களின் கால்கள் மீண்டும் வீட்டுக்குள் இழுக்கப்பட்டு, இன்னும் பல கனமான சங்கிலிகளால் பிணைக்கப்படுகின்றன!

 

- அ.வெண்ணிலா, கட்டுரையாளர், கல்வியாளர். தொடர்புக்கு: vandhainila@gmail.com

 

நன்றி திரு வெண்ணிலா மற்றும் தி இந்து / http://tamil.thehindu.com/opinion/columns/%E0%AE%95%E0%AE%BE%E0%AE%B0%E0%AF%88%E0%AE%95%E0%AF%8D%E0%AE%95%E0%AE%BE%E0%AE%B2%E0%AF%8D-%E0%AE%8F%E0%AE%A9%E0%AF%8D-%E0%AE%9F%E0%AF%86%E0%AE%B2%E0%AF%8D%E0%AE%B2%E0%AE%BF%E0%AE%AF%E0%AE%BE%E0%AE%95%E0%AE%B5%E0%AE%BF%E0%AE%B2%E0%AF%8D%E0%AE%B2%E0%AF%88/article5531683.ece#comments

காரைக்காலில் கொடூரம் பெண்ணை கடத்தி பலாத்காரம் - Karaikal Gangrape

திருவாரூரைச் சேர்ந்த 21 வயதான இளம் பெண்ணை புதுச்சேரியில் வைத்து பாலியல் பலாத்காரம் செய்ததாக கைதாகியுள்ள 12 பேரில் 2 பேர் ஏற்கனவே பாலியல் பலாத்கார வழக்கில் சிக்கி சிறை சென்றவர்கள் என்று தெரிய வந்துள்ளது.

 இதில் நாசர் என்பவர், திமுக எம்.எல்.ஏ. நஜீமின் உறவினர் என்று தெரிகிறது. இந்த நாசர், கடந்த 1999ம் ஆண்டிலேயே ஒரு பாலியல் பலாத்கார வழக்கில் சிக்கி 3 ஆண்டு சிறைத் தண்டனை பெற்றவராம். ஆனால் பின்னர் அப்பீலுக்குப் பின்னர் இந்தத் தண்டனை 18 மாதமாக குறைக்கப்பட்டதாம்.

புதுச்சேரிக்கு தனது தோழி மற்றும் அவரது காதலருடன் பாதிக்கப்பட்ட பெண் சுற்றுலா வந்திருந்தபோதுதான் இந்த கொடுமையை சந்திக்க நேர்ந்தது. 

அடுத்தடுத்து இரண்டு குழுக்களால் அவர் பலாத்காரம் செய்யப்பட்டார். பலாத்காரம் செய்வது தொடர்பாக இரண்டு குழுக்களிடையே மோதல் மூண்டபோது ரோந்து போலீஸாரிடம் அவர்கள் சிக்கினர். இதுவரை 12 பேர் கைது செய்யப்பட்டுள்ளனர். 

அந்தப் பெண் தற்போது தனியார் மருத்துவமனையில் அனுமதிக்கப்பட்டுள்ளார். அங்கு அவருக்கு தீவிர சிகிச்சை அளிக்கப்பட்டு வருகிறது. 

மொத்தம் 15 பேர் இந்த அக்கிரமச் செயலில் ஈடுபட்டதாக தெரிகிறது. இதில் 12 பேர் தன்னை பலாத்காரம் செய்ததாக அப்பெண் கூறியுள்ளார். 

முதலில் 3 பேர் சேர்ந்து அப்பெண்ணை கடத்திச் சென்று பலாத்காரம் செய்து விடுவித்துள்ளனர். பின்னர் இன்னொரு குழு வந்து அவரை பலாத்காரம் செய்து சீரழித்து விட்டது. கிட்டத்தட்ட 6 மணி நேரம் இந்த மனித மிருகங்களிடம் சிக்கித் தவித்துள்ளார் அப்பெண். 

புதுச்சேரி பலாத்கார பயங்கரம்.. 2 குற்றவாளிகள் ஏற்கனவே பலாத்கார வழக்குகளில் சிக்கியவர்கள்! Posted by: Sudha

Read more at: http://tamil.oneindia.in/news/tamilnadu/puducherry-gang-rape-two-the-12-arrested-men-were-booked-similar-190447.html

 இந்த நாய்களை என்ன செய்தால் தகும். இந்த நிகழ்வு நடந்து அய்ந்து நாட்கள் ஆகியும் பதிவுலகில் யாரும் கண்டிக்காமல் விட்டது எப்படி? டெல்லியில் நடந்தால் மட்டும் தான் குமுறி கொந்தளிப்போமோ.

இதில் வேதனை என்ன என்றால் சாதி மத பேதம் இன்றி மக்களின் நற்பெயரை சம்பாதித்து வைத்து இருக்கும் தொகுதி எம் எல் ஏ திரு நாஜிம் அவர்களின் உரவுக்காரனும் ஒருவனாம் இந்த நாய் கூட்டத்தில். அவருக்கு இது எவ்வளவு அவமானம்.

பின் குறிப்பு   : இதில் புதுச்சேரியில் என்ற இடத்தில் எல்லாம் காரைக்காலில் என்று படிக்கவும். ஊர் பெயர் ஏன் மாற்றி எழுதினார்கள் என் தெரியவில்லை

 நன்றி  :
தட்ஸ்டமில் மற்றும் http://www.newindianexpress.com/

பெண்கள், வன்புணர்வு, பர்தா - நாம் எதை நோக்கி போய்க் கொண்டிருக்கிறோம்

நாம் எங்கு போய்க் கொண்டிருக்கிறோம். 21 ம் நூற்றாண்டிலிருந்து 22 ம் நூற்றாண்டை நோக்கியா இல்லை மீண்டும் கி.மு.வை நோக்கியா.

அறிவு ஜீவிகளாக கருதிக் கொண்டு சிலர் உதி்ர்க்கும் கருத்து்கள் அப்படித் தான் இருக்கிறது

 

இஸ்லாமிய பெண்கள் போல பெண்கள் அனைவரும் பர்தா அணிய வேண்டும் என்ற கருத்து முத்தை உதிர்த்திருப்பவர் கடந்த சில நாட்களுக்கு முன்பு வரை நித்தியானந்தாவின் சொர்க்கத்தில் எல்லையற்ற இன்பங்களில் மூழ்கி கிடந்தவர். அதற்கு பலனாக இளைய ஆதின பதவியையே விலையாக தந்தவர்.

 

 இவரெல்லாம் சமுதாய நலனை பற்றி பேசவில்லை என யார் அழுதது.

இதைப் போன்ற இன்னொரு கருத்து முத்தை Dr. Anita Shukla என்ற விஞ்ஞானி, தான் ஒரு பெண் என்பதையும் மறந்து விட்டு கீழ்கண்டவாறு கூறியுள்ளார்.

‘Women instigate men to commit such crimes'. She accused the victim of being insensible as she was out of her house after 10 pm. Shukla claimed that if a girl wanders late at night with her boyfriend; such situations are bound to happen.

அதாவது   பாதிப்புக்கு உள்ளான அந்த பெண் இரவு பத்து மணிக்கு மேல் ஏன் வீட்டை விட்டு வெளியில் தன் ஆண் நண்பருடன் சுற்றி திரிய வேண்டும்.

 

அதனால் தான் இப்படி பாலியல் பலாத்காரத்திற்கு பலியாக நேரிட்டது.

அதாவது இரவில் வெளியில் செல்லும் உரிமை பெண்களுக்கு கிடையாது.

 

ஆண்கள் மட்டுமே இரவில் ஊர் சுற்றலாம், வீதியில் தண்ணி அடிக்கலாம் எதிரில் ஏதேனும் பெண்கள் தென்பட்டால் தங்கள் காம வெறியை தீர்த்து கொள்ளலாம்.

 

அதற்கு எதிர்ப்பு தெரிவித்தால் அந்த பெண்ணின் குடலை வெளியில் உருவி போடலாம்.

 

ஆஹா என்னே சமத்துவம் என்னே சனநாயகம்.

மேலும் அந்த விஞ்ஞானி கூறுகிறார்

‘The victim should have surrendered when surrounded by six men, at least it could have saved her intestines'

அதாவது, அந்த பெண் தன்னை ஆறு பேர்  சூழ்ந்து பலாத்காரம் செய்ய முற்படுகையில் அவர்களுக்கு அடங்கி ஒத்துழைப்பு கொடுத்திருந்தால் தனது குடலை காப்பாற்றியிருக்கலாம்

ஆஹா என்னே ஒரு க(பெ)ண்ணியமான கருத்து. இதையே தான் தான் பெற்ற பெண்களுக்கும் சொல்லி வளர்ப்பாரோ என்னமோ.

 

அதாவது காஞ்சனா என்ற படத்தில ஸ்ரீமன், ஆவியை பார்க்கும் போதெல்லாம் வாய் கோணி கொண்டே படுத்து கொள்வார். அதைப் போல, எவனாவது காம பார்வை பார்த்து கொண்டே தன்னை நெருங்கினால்  பெண்களும் அவனுக்கு ஒத்துழைக்க தன்னை தயார் படுத்திக் கொள்ள வேண்டும் என எதிர் பார்க்கிறாரோ இந்த மனிதாபிமானம் அற்ற பெண் விஞ்ஞானி.

 

 

குற்றம் செய்தவனை விட்டு விட்டு பாதிக்கப் பட்டவர்களுக்கே தண்டனை தரும் கூட்டம் இந்த கூட்டம்.

 

இவர்கள் சொல்வதை எல்லாம் நடைமுறைப் படுத்த ஆரம்பித்தால் எங்கே போய் நிற்கும் என் பாருங்கள்.

 .

இரவில் வெளியே போகாதே.

 

வேலை செய்வதால் வெளியே போக வேண்டிய சூழ் நிலை உள்ளதா -வேலைக்கே போகாதே.

 

பகலிலும் பாலியல் பலாத்காரம் நடந்து விட்டால் -

பகலிலும் வெளியே போகாதே

 

பள்ளிகூடம் போக வேண்டிய நிர்ப்பந்தம் இருப்பதால் - 

நீ படிக்கவே வேண்டாம்

 

கண்டிப்பாக வெளியில் சென்று தீர வேண்டிய நேரங்களில் - ஆண் துணையோடு,  ஜமுக்காளத்திற்குள் உன் உடலை ஒளித்துக் கொண்டு போ

 

 

பெற்றவர்கள் பாது காப்பில் அடைந்து கிட - திருமணம் வரை.

 

பின் கணவனுக்கு சமைத்து போடு, அவனது பாலியல் தேவைகளை தீர்த்து வை.

 

பின் பிள்ளைகளை பெற்று, வளர்.

 

பெண் பிள்ளை என்றால் அவளிடம்,   நீ பிறந்ததே, உன்னை கட்டிக்கப் போற ஆணுடைய பாலியல் தேவைகளை பூர்த்தி செய்யவே என சொல்லி கொடுத்து வளர்.

 

இதுக்கு ஏன் உனக்கு படிப்பு, வேலை, சுய மரியாதை எல்லாம்.

                                    

 மொத்தத்தில் பெண்களை பார்த்து இப்படி சொல்லி விடலாம் :

காப்பி மெஷின், வாஷிங்மெஷின், தையல் மெஷின் இவையெல்லாம் கேட்கிறதா எனக்கு படிப்பு வேண்டும் வேலை வேண்டும் சுயமரியாதை வேண்டும்  என்று.

 

ஆனால் ஆண்களின் செக்ஸ் மெஷின் ஆன நீ மட்டும் ஏன் இதை எல்லாம் எதிர் பார்க்கிறாய்.